SHBA mbështet dialogun Prishtinë-Beograd

Zëvendësndihmës Sekretari i SHBA-së, Philip Reeker i ka dhënë mbështetje dialogut- Kosovë-Serbi për normalizimin e raporteve fqinjësore

Zëvendësndihmës Sekretari i SHBA-ve, Philip Reeker i ka dhënë mbështetje dialogut- Kosovë-Serbi për normalizimin e raporteve fqinjësore

Departamenti amerikan i Shtetit i ka dhënë mbështetje të fuqishme dialogut Prishtinë-Beograd dhe ka inkurajuar dy palët për vazhdimin e negociatave. SHBA, po ashtu është e kënaqur me takimin e parë të dy kryeministrave, ndërkaq inkurajon Brukselin që të stimulojë vazhdimin e takimeve të tjera.

Zëvendësndihmës Sekretari i Shtetit, Ambasadori Philip Reeker ka folur sot në Qendrën për Mediume të Huaja në Washington DC lidhur me politikën e SHBA-ve dhe zhvillimet në Evropën Jugore Qendrore. Në një pjesë të fjalës së tij, sipas një njoftimi lëshuar nga Ambasada e SHBA-ve në Kosovë, Rekeer ia kushtoi takimit Thaçi-Daçiq.

“Ne fuqimisht përkrahim vazhdimin e dialogut drejt normalizimit të marrëdhënieve dhe zgjidhjen e mospajtimeve e që do t’i mundësojë edhe Republikës së Kosovës edhe Republikës së Serbisë që të ecin përpara në rrugët e tyre evropiane”, ka deklaruar zëvendës ndihmëssekretari Reeker.

Një nga sfidat kryesore, siç tha ai, janë marrëdhënia mes Serbisë dhe Kosovës. SHBA, sipas tij, tashmë është e kënaqur pas sinjaleve nga Brukseli, lidhur me vazhdimin e dialogut të lehtësuar nga BE-ja mes Kosovës dhe Serbisë.

“Kjo është diçka që ne e përkrahim shumë. Sekretarja Clinton dhe zonja Ashton janë në kontakt të ngushtë lidhur me këto çështje sikurse edhe Ndihmës Sekretari Gordon, dhe unë bashkë me homologët tanë në BE”, thotë ai.