SHBA vendos sanksione për Milorad Dodikun

Sanksionet nënkuptojnë bllokimin e të gjitha pronave të luajtshme apo paluajtshme që Dodik mund të ketë në SHBA apo dhe të personave të lidhur me të.

Departamenti Amerikan i Thesarit në një deklarate për media ka bërë të ditura sanksionet që ka vendosur ndaj anëtarit serb të Presidencës së Bosnje Hercegovinës, Millorad Dodik.

Sipas njoftimit sanksionet janë vendosur për veprat që cenojnë stabilitetin e Bosnje Hercegovinës dhe përfshirjen e tij në afera korruptive.

“Dodiku ka minuar institucionet e Bosnje e Hercegovinës duke bërë thirrje për marrjen e kompetencave shtetërore dhe duke iniciuar krijimin e institucioneve paralele në entitetin e Republikës Sërpska të Bosnje e Hercegovinës. Për më tepër, Dodik ka përdorur pozitën e tij zyrtare që ka në Bosnje për të përfituar pasuri për vete përmes ryshfetit dhe formave të tjera të korrupsionit. Retorika e tij ndarëse ento-nacionaliste reflekton në përpjekjet e tij për të avancuar këto qëllime politike dhe për të shpërqendruar vëmendjen nga aktivitetet e tij korruptive. Këto veprime kërcënojnë stabilitetin, sovranitetin dhe integritetin territorial të Bosnje e Hercegovinës dhe minojnë Marrëveshjen e Paqes së Dejtonit, dhe në këtë mënyrë rrezikojnë stabilitetin më të gjerë rajonal”, thuhet në njoftimin nga Departamenti amerikan i Thesarit, transmeton Albinfo.ch.

 

---