Shkollat e Bazelit duhet t’i paraqesin problemet me nxënësit me shtetësi të huaj

Pra, "problemet më serioze" duhet të paraqiten: Parlamenti ju referohet problemeve të mospjesëmarrjes apo pengimit masiv të mësimit, por edhe mosrespektimit ndaj personave të gjinisë së kundërt dhe radikalizimit të nxënësve

Foto ilustrim

Shkollat e rrethinës së Bazelit do të obligohen që Entit Zviceran të Migrimit t’ia paraqesin vështirësitë e integrimit të nxënësve me shtetësi të huaj.

Të enjten, Parlamenti ka miratuar një ndryshim të Ligjit pas skandalit me refuzimin e përshëndetjes me dorë të dy nxënësve me mësuesen zvicerane.

Pra, “problemet më serioze” duhet të paraqiten: Parlamenti ju referohet problemeve të mospjesëmarrjes apo pengimit masiv të mësimit, por edhe mosrespektimit ndaj personave të gjinisë së kundërt dhe radikalizimit të nxënësve.

Me këtë rast, pati mendime të kundërta në Parlament, pasi ndryshimi i Ligjit, mësuesve do t’u mundësonte presion më të madh mbi nxënësit.

Përpos kësaj, drejtoritë shkollore do të duhet të përkujdesen që të sigurojnë “shkollim jodiskriminues”, ndërsa për vazhdimin e programeve të veçanta jashtë mësimit obligativ, në kuadër të masave disiplinore duhet të llogaritet me pagesë përkatëse, shkruajnë gazetat zvicerane, përcjell Albinfo.ch.

Ndryshimi i Ligjit u kërkua pas skandalit me refuzimin e përshëndetjes me dorë të nxënësve ndaj mësueses zvicerane në fillim të vitit 2016, në Therwil, reagim që shkaktoi jehonë edhe jashtë kufijve të Zvicrës.

Në shkollën e mesme në Therwil, atëbotë drejtoria i kishte dispersuar dy nxënës të konfesionit islam, pasi kishin refuzuar të përshëndeten me dorë, me mësuesen e tyre, për arsye religjioze.