Shkollat i përgjigjen grevës së SBASHK-ut, Haradinaj premton zgjidhje

Mësimdhënësit në gjithë vendin kanë mbajtur grevë në orën e parë të mësimit, duke kërkuar nga ekzekutivi respektimin e kontratës së nënshkruar gjatë fushatës elektorale.

Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj, ka vizituar shkollën fillore “Xhemail Mustafa”, ku tha se ata janë detyruar të mbajë grevën njëorëshe, përcjell albinfo.ch.

Qeveria, sipas tij, nuk mbajti fjalën në raport me punëtorët e arsimit, ndërsa ka paralajmëruar se nëse nuk ka lëvizje, priten protesta të mësimdhënësve. Jashari përgëzoi mësimdhënësit për unitetin dhe tha se shpreson që këto masa të bëjnë që institucionet të këndellen.

Nëse qeveria nuk respekton marrëveshjen, SBASHK-u paralajmëron vazhdim të grevës më 20 shkurt, ku nuk do të mbahen dy orë mësimi.

Ndërsa kryeministri Ramush Haradinaj, përmes një postimi në Facebook, ka paralajmëruar se gjatë ditëve të ardhme do të takohet me përfaqësuesit e SBASHK-ut për trajtimin e kërkesave që i shtyri mësimdhënësit të mbajnë grevë në orën e parë të mësimit.