Shkurtime masive të vendeve të punës në Lucernë: Mbi 100 persona humbin vendin e punës

Dy kompani në kantonin e Lucernës do të largojnë gjithsej 112 punonjës, pas vendimeve të marra nga kompanitë mëmë jashtë vendit.

Mbi 100 punonjës do të mbesin pa vend pune në kantonin e Lucernës, pasi dy kompani kanë njoftuar për shkurtime të konsiderueshme të stafit, përcjell albinfo.ch.

Kompania Andritz Beutler AG në Gettnau ka bërë të ditur se do të largojë nga puna 50 punonjës, ndërsa Serge Ferrari Tersuisse SA në Emmenbrücke do të shkurtojë 62 vende pune. Në total, 112 persona pritet të preken nga këto masa.

Sipas raportimeve, këto vendime lidhen me strategjitë dhe vendimet e marra nga kompanitë mëmë të këtyre ndërmarrjeve, të cilat ndodhen jashtë Zvicrës.

Ky njoftim vjen vetëm një ditë pasi kompania e kartave të kreditit Swisscard bëri të ditur se do të shkurtojë edhe 40 vende pune në zyrën e saj në Cyrih. Shkurtimet në këtë kompani pritet të hyjnë në fuqi më 1 maj.

Në këtë mënyrë, brenda pak ditësh janë paralajmëruar dhjetëra humbje të vendeve të punës në sektorë të ndryshëm në Zvicër, duke ngritur shqetësime për situatën e punësimit në disa kompani ndërkombëtare që operojnë në vend./Albinfo.ch

---