Shoqatat humanitare: Zvicra duhet të pranojë 100.000 sirianë

"Nuk është jorealiste të pranohet një numër i tillë kur dihet se në krahasim me numrin e atyre që kanë strehuar vendet fqinje të Sirisë, ai serish do të ishte një numër i vogël"

Po u dëgjuan organizatat humanitare zvicerane dhe ato që merren me mbrojtjen e të drejtave të refugjatëve, Zvicra do të duhej të pranonte jo më pak se 100 mijë refugjatë nga Siria. Këtë kërkesë e kanë bërë përmes një letre të hapur drejtuar autoriteteve një numër organizatash të refugjatëve.

Zvicra mundet por edhe duhet të pranojë 100 mijë refugjatë sirianë, thuhet veç tjerash në arsyetimin e letrës së nënshkruar nga 27 shoqata , në mesin e të cilave është edhe organizata Solidarite sans Frontieres. Në këtë kontekst sipas tyre nuk ka rëndësi se çfarë statusi do t`u jepet atyre në rast se do të strehoheshin në Zvicër.

Aktualisht Këshilli Federal duke plotësuar një kërkesë të bërë nga Dhoma Nacionale e Parlamentit të Zvicrës është duke bërë shqyrtimin rreth asaj se çfarë masash do të mund të pranoheshin grupe më të mëdha të refugjatëve.

Në konferencën e mbajtur me këtë rast deputeti nacional nga Partia e Gjelbër, Balthasar Glättli ka thënë se që nga Lufta e Dytë Botërore asnjëherë nuk ka pasur në botë kaq shumë njerëz të arratisur (refugjatë) nga vendi i tyre sikur aktualisht, nga Siria  dhe gjetiu.  

Prandaj nuk është jorealiste të pranohet një numër i tillë, sidomos kur dihet se në krahasim me numrin e atyre që kanë strehuar vendet fqinje të Sirisë, ai serish do të ishte një numër i vogël. Veç kësaj,edhe nga fakti se Zvicra është ndër shtetet më të pasura në botë, ka obligime morale kundrejt njerëzve në nevojë.