‘Shpërthen’ Sadiku, realizon dy gola

Bilanci i sulmuesit shqiptar është tre gola në po aq ndeshje të luajtura në këtë edicion dhe tregon qartësisht se ai nuk e ka humbur aspak nuhatjen para portës

Armando Sadiku i është kundërpërgjigjur më së miri trajnerit të Zurichut, Uli Forte, i cili e kishte akuzuar se kishte “humbur instinktin para portës kundërshtare”. Sulmuesi i Kombëtares shqiptare ka qenë protagonist absolut i fitores me rezultat 4:0 përballë Wohlen, në javën e tretë të kampionatit zviceran, shkruan albinfo.ch.

Sadiku ishte si zakonisht titullar në këtë sfidë dhe shumë shpejt tregoi formën e tij, duke kaluar në avantazh Zurichun në minutën e 19-të. Golat e Vinter dhe Rodriguez para fundit të pjesës së parë kthyen në formalitet vijimin e ndeshjes.

Trajneri Forte vendosi që të linte sulmuesin në fushën e lojës edhe në pjesën e dytë, ndonëse fati i ndeshjes nuk ishte në diskutim dhe Sadiku e shpërbleu me një tjetër gol të shënuar në minutën e 83-të duke vulosur rezultatin përfundimtar 4:0. Pas këtij goli, për herë të parë në këtë sezon, Sadiku më në fund festoi faktin që gjeti rrugën e rrjetës me Zyrihun.

Bilanci i sulmuesit shqiptar është tre gola në po aq ndeshje të luajtura në këtë edicion dhe tregon qartësisht se ai nuk e ka humbur aspak nuhatjen para portës. Sadiku vazhdon të jetë në kërkim të një skuadre të re për këtë sezon, pasi nuk dëshiron që të kalojë një vit duke luajtur në Kategorinë e dytë zvicerane, edhe pse aty mund të përmirësojë statistikat e tij personale.

Përveç dygolëshit të Sadikut, lajmi tjetër i mirë nga kjo sfidë është aktivizimi nga minuta e parë i Burim Kukelit, i cili la pas dëmtimin e javës së kaluar dhe luajti për më shumë se një orë në këtë ndeshje.