Shpërthim dhe të shtëna në Mynih, një i vdekur dhe një i plagosur

Mynih: Vetëvrasje me shpërthim në banesë familjare

Një ngjarje e rëndë ka tronditur qytetin e Mynihut mëngjesin e së mërkurës, ku një person ka humbur jetën dhe një tjetër ka mbetur i plagosur pas të shtënave me armë zjarri dhe shpërthimeve të fuqishme në lagjen Lerchenauer Straße, në pjesën veriore të qytetit, përcjell albinfo.ch.

Sipas të dhënave paraprake nga autoritetet gjermane, dyshohet se autori i ngjarjes kishte mbushur me eksploziv banesën e prindërve të tij, i kishte vënë flakën dhe më pas kishte kryer vetëvrasje. Një re tymi e dendur ishte e dukshme që në orët e para të mëngjesit, ndërsa zona është izoluar në një perimetër të gjerë sigurie.

Në vendin e ngjarjes kanë mbërritur forcat e sigurisë, njësitë speciale, zjarrfikësit dhe ekspertët piroteknikë, të cilët po punojnë për mbledhjen e provave dhe garantimin e sigurisë në zonë. Operacioni është ende në zhvillim, ndërsa hetimet vijojnë për të sqaruar rrethanat dhe motivet e plota të incidentit.

Shefi i policisë lokale, Thomas Schelshorn, deklaroi për mediat se qytetarët nuk janë në asnjë rrezik dhe se ngjarja nuk ka asnjë lidhje me festivalin Oktoberfest, i cili po zhvillohet aktualisht në qytet.

---