Shqipëri, 4-vjeçari i infektuar me HIV

Më 21 dhjetor, Kujtimi i mbush 4 vjet, ndërsa nga lindja është i sëmurë me HIV. Pas vdekjes së prindërve, ai jeton me gjyshen në varfëri të rëndë dhe i izoluar nga bota

Është vetëm katër vjeçar dhe tani ka dëshirë të shkoj në çerdhe dhe të luaj me fëmijët tjerë me top, ndërsa ëndrrat e tij është që kur të rritet të bëhet mësues. Por, të gjithë këto aktualisht, duket se do të mbesin vetëm dëshira për Kujtimin nga Vlora, i cili mori virusin HIV nga prindërit e tij, tashmë të vdekur.   

Më 21 dhjetor, Kujtimi i mbush 4 vjet. Ai është i sëmurë me HIV, ndërsa pas vdekjes së prindërve, ai jeton me gjyshen Fejzie Resulaj dhe dy motrat e tij 14 dhe 10 vjeç, të cilat fatmirësisht nuk janë të infektuara me HIV.

Megjithatë e keqja e gjithë kësaj është se familja ku jeton Kujtimi, jeton në varfëri të plotë, e pa asnjë ndihmë nga shteti, raporton BW. Prandaj, dëshirat e 4 vjeçarit për të shkuar në kopsht, për të luajtur me fëmijët dhe për të vazhduar shkollimin, mbesin vetëm ëndërrtat e Kujtimin.

Gjyshja e tij, e cila mbijeton për këta tre fëmijë thotë se vazhdimisht i është drejtuar instancave për ndihmë, Shërbimit Social Shtetëror e organizmave të ndryshme, me qëllim që për 4 vjeçarin, të mundësohet një jetë komunitare në qendra të specializuara, por asgjë nuk është plotësuar.

Sipas Fejzies, institucionet nuk duan tija dinë për tre jetimët, duke e lënë 4 vjeçarin me HIV/AIDS, në mëshirë të fatit, e duke ekspozuar ndaj sëmundjes edhe dy motrat e tij.

“Jam shumë e mërzitur që shteti më ka lënë pas dore ndjehem shumë e përbuzur edhe kur shkoj në spital. Unë jam 65 vjeçe ku është ajo mortje, ku është futur, të më marrë mua se nuk e dua jetën! Nuk kam parë asnjë ndihmë, nuk mora asgjë. Dua të ma marrin djalin në qendër, siç më kanë premtuar”, shprehej gjyshja e Kujtimit.

Ajo thotë se në shtëpinë e saj nuk shkon asnjëri, sepse kanë frikë nga 4-vjeçari.

Në ditën ndërkombëtare kundër HIV/AIDS, Fejzia i bën apel shtetit të vërë dorë për Kujtimin e vogël të cilit rrezikon të ketë fatin e nënës e babës së tij, të cilët kanë humbur jetën nga e njëjta sëmundje.

Ndrysh, vetëm gjatë vitit 2014 në Shqipëri janë raportuar 75 raste të reja të të infektuarve me HIV/AIDS, ndërsa 7 persona e kanë humbur jetën brenda vitit. Sipas infektologëve shqiptarë, janë 5 fëmijë të infektuar me HIV/AIDS, 4 prej të cilëve me anë të transmetimit vertikal.

Ndërsa vdekjet nga SIDA në Shqipëri shkojnë në 144, prej që kjo sëmundje është zbuluar dy dekada më parë.