Shqipëri: 54% më shumë të huaj në shkurt

@pixabay

Të huajt që zgjedhin të vizitojnë Shqipërinë kanë ardhur në rritje. Edhe gjatë muajit shkurt ka një rritje me 54% në krahasim me të njëjtën periudhë të një viti më parë. Nëpërmjet një postimi në rrjetet sociale, kryeministri Edi Rama shkruan se “për dy muajt e parë të këtij viti, mbi 686 mijë vizitorë të huaj kanë frekuentuar Shqipërinë, ose 74% më shumë se e njëjta periudhë në vitin 2022.”

Sipas të dhënave zyrtare, në muajin shkurt të këtij vitit në pikat kufitare të vendin tonë kanë hyrë 309,325 vizitorë të huaj, ndërsa në shkurt të vitit të kaluar janë 201 mijë.

Rritja e numrit të turistëve ishte më e vogël se sa në muajin janar, pasi INSTAT raportoi se në janar 2022, hynë 192 mijë shtetas, ndërsa në janar të këtij viti ishin 377 mijë, duke pësuar një rritje me 94%.

Për të dy muajit bashkë rritja është më e ndjeshme, pasi arrin në 74%. Për periudhën janar-shkurt të 2022 Shqipëria u vizitua nga mbi 395 tursitë, ndërsa në dy muajit e parë të këtij vitit janë më shumë se 686 mijë turistë të huaj.

Sipas INSTAT në muajin janar 2023, treguesit e shfrytëzimit të kapaciteteve të strukturave akomoduese, tregojnë se ka një rritje me 67.9% të turistëve jorezidentë, ndërsa net qëndrimet gjithsej janë rritur me 1,3 %, në krahasim me janar 2022.

Gjatë vitit 2022 numri i turistëve të huaj që hynë në territorin shqiptar ishte 7.5 milionë, duke thyer rekordin e para pandemisë. Por, sipas operatorëve të turizmit, viti 2023 do të jetë më i suksesshëm./ Klan News