Shqipëri: Kushtetuesja pezullon ratifikimin e marrëveshjes me Italinë për emigrantët

EPA/GEORGI LICOVSKI

Gjykata Kushtetuese e Shqipërisë e ka pezulluar përkohësisht ratifikimin e mundshëm të një marrëveshjeje për emigrantët mes Shqipërisë dhe Italisë.

Marrëveshja e nënshkruar më 6 nëntor nga kryeministri i Shqipërisë, Edi Rama, dhe kryeministrja italiane, Giorgia Meloni, parasheh që Italia t’i dërgojë në Shqipëri emigrantët që i kap dhe i shpëton në Detin Mesdhe, duke filluar nga pranvera e vitit të ardhshëm, teksa pritej të hidhej nga Kuvendi në votim për ratifikim në një seancë sot, më 14 dhjetor, përcjell albinfo.ch.

Vendimi për pezullim vjen pasi 30 deputetë të opozitës e dorëzuan më 6 dhjetor në Gjykatë Kushtetuese një kërkesë për shqyrtimin e kushtetuetshmërisë së marrëveshjes dhe pezullimin e procedurave të ratifikimit të saj derisa gjykata të marrë vendim përfundimtar, ndërsa gjykata bëri me dije se shqyrtimi i kërkesës së opozitës do të nisë më 18 janar.