Shqipëri: Një grup të rinjsh protestojnë në Kuvend për votën e Diasporës

Në Tiranë, një grup të rinjsh nga diaspora protestuan sot në Kuvend gjatë seancës plenare, duke kërkuar pjesëmarrjen e diasporës në zgjedhjet e vitit të ardhshëm, përcjell albinfo.ch.

Ata shpalosën parrullën “Dua të votoj në 2025 nga Diaspora” mbi ballkonin e seancës plenare, ku qëndrojnë mediat dhe të ftuarit, si dhe hodhën letra të bardha mbi kokat e deputetëve.

Në thirrjet e tyre drejtuar ligjvënësve, protestuesit kujtuan se Kuvendi nuk po zbaton vendimin e Gjykatës Kushtetuese për të mundësuar pjesëmarrjen në zgjedhje të qytetarëve nga diaspora dhe se është humbur një vit e gjysmë për të realizuar ndryshimet ligjore të kërkuara nga gjykata.