Shqipëria e Kosova, përfaqësim dinjitoz në turneun e Neymarit

Shqipëria arriti që të kualifikohet deri në gjysmëfinale, derisa përfaqësim mjaft të mirë kishte edhe Kosova

Shqipëria arriti që të kualifikohet në gjysmëfinale të Kampionatit Botëror të futbollit të vogël, turne ku mori pjesë edhe Kosova dhe u përfaqësua në mënyrën më të mirë të mundshme, shkruan albinfo.ch.

Në këtë turne morën pjesë 50 skuadra më të mira të botës, derisa ajka ishte në finalen e turneut të zhvilluar në Sao Paolo të Brazilit, që u organizua nga futbollisti i Barcelonës, Neymar në Akademinë e tij.

Shqipëria që u përfaqësua me skuadrën Vetëtima dhe u shortua në Grupin C, ku arriti të fitojë dy ndeshje me Perunë dhe Kanadanë e Lindjes duke u renditur dhe të 3-tët në grupin e tyre.

Në fazën e dytë, Shqipëria fitoi 5:0 me Turqinë, ndërsa në 1/8 kuqezinjtë mundën po me të njëjtin rezultat Portugalinë. Në çerekfinale, djemtë shqiptarë mposhtën Greqinë 1:0 përpara se të eliminoheshin në gjysmëfinale nga Holanda. Kampione e turneut u shpall Brazili, që mposhti në finale Holandën, ndërsa nëse do të kishte patur takim për vendin e tretë ai do të duhej të luhej mes Shqipërisë dhe Serbisë. Kapiten i skuadrës shqiptare ishte Denis Hyka, ndërsa katër lojtarët e tjerë ishin Xhuljan Reci, Erald Leci, Klajdi Ibrahimi dhe Jurgen Isaku.

Ky turne ka bërë bashkë shumë shtete të botës, ndërsa Kosova u përfaqësua me dinjitet nga futbollistët e Feniksit, Driton Nishori, Ardiani Hoti, Shqipron Ibrahimi, Fisnik Ejupi dhe Agon Ramadani.

Kosova me futbollistët e Feniksit ka arritur të fitojë dy ndeshje, të barazojë një dhe të humbë vetëm një duke kaluar me sukses në fazën tjetër e më pas u eliminua në penallti. Prapa këtij turneu është ylli brazilian, Neymar i cili e ka shpërndarë një video përmbledhëse të këtij turneu ku shihet edhe futbollisti kosovar, Dardan Topilla.