Shqiptarët nga Kosova, më të lumturit në rajon edhe për këtë vit

Kosova, vendi më i lumtur në rajon

Referuar listës së Raportit Botëror të Lumturisë, shqiptarët nga Kosova edhe për vitin 2025 janë më të lumturit në rajon, shkruan albinfo.ch.

Kosova, ashtu si vitin e kaluar, mban vendin e 29-të në listën e shteteve më të lumtura në botë.

Vlen të theksohet se studimi u zhvillua në 147 shtete.

Vendet e tjera të Ballkanit Perëndimor renditen relativisht larg Kosovës sa i përket nivelit të lumturisë.

Serbia renditet në vendin e 31-të, Shqipëria në vendin e 89-të, Bosnja në vendin e 56-të, Mali i Zi në vendin e 71-të dhe Maqedonia e Veriut në vendin e 86-të.

Renditja, e publikuar nga Qendra Kërkimore e Mirëqenies në Universitetin e Oksfordit, u përcaktua përmes anketave të vetëvlerësimit, ku individët vlerësuan jetën e tyre në një shkallë nga 0 deri në 10 – ku 0 përfaqëson jetën më të keqe të mundshme dhe 10 jetën më të mirë të mundshme.

Ky është Raporti i 13-të vjetor i Lumturisë Botërore, i publikuar për të shënuar Ditën Ndërkombëtare të Lumturisë të OKB-së.

Për herë të tetë radhazi, finlandezët janë renditur si njerëzit më të lumtur në botë.

---