Shqiptarët paguhen më pak, por blejnë më shtrenjtë se evropianët

Këpucët më të shtrenjta janë në Zvicër dhe më të lirat në Turqi

Shqipëria është vendi me të ardhurat më të ulta në Evropë, por që shumë produkte i blejnë më shtrenjtë se në vendet me të ardhura të larta.

Të dhënat e fundit të publikuara nga Eurostat mbi indeksin e çmimeve të konsumit, me referencë mesataren e Bashkimit Evropian për produktet kryesore të shportës për vendet e BE-së dhe Ballkanit perëndimor kanë nxjerrë në pah disa nga produktet që shqiptarët i blejnë më shtrenjtë, shkruan Euronews, transmeton albinfo.ch.

Pijet alkoolike në Shqipëri kushtojnë 25% më shumë se mesatarja evropiane. Alkooli më i shtrenjtë në Evropë është në Irlandë, me 60% më shumë se mesatarja evropiane dhe më i liri në Maqedoninë e Veriut dhe Turqi, përkatësisht 33.7% dhe 26.4% e mesatares evropiane.

Pajisjet elektroshtëpiake janë gjithashtu të shtrenjta, teksa kushtojnë 22% më shumë sesa mesatarja evropiane. Më të lirat në Evropë, pajisjet elektroshtëpiake i gjen në Poloni dhe më të shtrenjtat në Islandë.

Edhe një vend bujqësor, Shqipëria, qumështin dhe djathin nuk i ka më aq të lira. Familjet shqiptare i blejnë këto produkte 11.8% më shtrenjtë sesa mesatarja evropiane.

Krahas qumështit dhe vajrat e yndyrat janë më të shtrenjta se mesatarja evropiane.

Për të blerë një palë këpucë, që në Evropë kushtojnë mesatarisht 100 euro, në Shqipëri duhen 105.5 euro.  Këpucët më të shtrenjta janë në Zvicër dhe më të lirat në Turqi.

Kjo panoramë tregon se çmimet në Shqipëri janë të shtrenjta, por të ardhurat mbeten të ulëta. Të dhënat e fundit të përditësuara të Eurostat tregojnë se të ardhurat për frymë në raport me Prodhimin e Brendshëm Bruto në Shqipëri janë sa 34% e mesatares së Bashkimit Evropian, duke bërë që vendi ynë të renditet i fundit.

Edhe treguesi tjetër, ai i konsumit individual për frymë, që mat të ardhurat sipas fuqisë blerëse, apo mirëqenien e një familjeje e vendos Shqipërinë në fund, së bashku më Bosnjë Hercegovinën, me 41% të mesatares evropiane.

---