Shqiptari i Bayern Munichut

Futbollisti quhet Meritan Shabani dhe është një mesfushor 17 vjeçar me tipare sulmuese i cili prej disa vitesh është pjesë e akademisë së bavarezëve

Carlo Ancelotti ka debutuar për Bayern Munich, derisa qysh në ndeshjen e parë miqësore i ka dhënë hapësirë një futbollisti shqiptar, shkruan albinfo.ch.

Futbollisti në fjalë quhet Meritan Shabani dhe është një mesfushor 17 vjeçar me tipare sulmuese i cili prej disa vitesh është pjesë e akademisë së bavarezëve.

Ky është një konfirmim për lojtarin, pasi edhe Pep Guardiola e kishte marrë shpesh në stërvitje me ekipin e parë gjatë vitit të kaluar futbollistin e talentuar, i cili kishte treguar vlerat e tij edhe në UEFA Youth League.

Në miqësoren e parë të Bayern Munich nën drejtimin e Carlo Ancelottit kundër Lipshtad, Shabani qëndronte në stolin e rezervave. Ai u aktivizua në minutën e 62-të të sfidës, duke zënë vendin e Xabi Alonsos në mesfushën e kampionëve të Gjermanisë, në ndeshjen që përfundoi me shifrat 4:3 për Bayernin. Ai është nga fshati Vojnoc i Komunës së Shtimes.

Mungesa e disa titullarëve që janë ende me pushime si dhe dëmtimi i radhës i Arjen Robben do t’i japë mundësinë Shabanit të aktivizohet përsëri në miqësoret në vazhdim para syve të një trajneri me shumë emër si Ancelotti.