Shtetet me më së shumti pjesëmarrës në Olimpiadën ‘Parisi 2024’

@pixabay

Shtetet e Bashkuara të Amerikës do të kenë 592 pjesëmarrës në Lojërat Olimpike Paris 2024, ndjekur nga Franca e Australia. 32 rusë e bjellorusë do të garojnë pa flamujt e vendeve të tyre, ndërkohë që e pranishme është edhe skuadra olimpike e refugjatëve.

Ja shifrat e pjesëmarrësve në Lojëra:

10,714 sportistë nga 206 vende do të marrin pjesë në ngjarjen më të madhe sportive, Lojërat Olimpike Verore, të cilat nisin më 26 korrik në Paris. Për shkak të agresionit rus në Ukrainë, në Lojërat Olimpike nuk do të ketë atletë që konkurrojnë me flamurin e Rusisë dhe të Bjellorusisë. Atletë rusë dhe bjellorusë do të mund të konkurrojnë si atletë individualë të pavarur, për sa kohë që nuk përkrahin aktivisht luftën, pasi të jenë miratuar nga federatat ndërkombëtare të sporteve të tyre e më pas nga paneli i Komitetit Olimpik Ndërkombëtar.

Vendi me numrin më të madh të sportistëve pjesëmarrës është Shtetet e Bashkuara të Amerikës, me 592, ndjekur nga Franca me 573 dhe Australia me 460. Pas tyre vijnë Gjermania dhe Italia me 428 e 403 përkatësisht, duke plotësuar pesëshen e parë.

Vendi me popullsinë më të madhe në botë, India, do të ketë vetëm 117 atletë, në vendin e 25-të për numrin e pjesëmarrësve, ndërsa Kina, që është edhe ndër kandidatët kryesorë për të fituar garën e medaljeve të arta, është e shtata për numrin e pjesëmarrësve, me 388.

17 bjellorusë dhe 15 rusë do të konkurrojnë pa flamurin e vendeve të tyre, ndërsa skuadra olimpike e refugjatëve do të ketë 37 anëtarë, 14 prej të cilëve nga Irani. Belize, Lihtenshtejn, Nauru dhe Somalia do të kenë vetëm nga një përfaqësues.