Shteti evropian që vendosi limite për temperaturën e kondicionerëve

Qeveria spanjolle ka rënë dakord të prezantojë masa urgjente për të kursyer energji për shkak të krizës energjetike që u shfaq në Evropë pas pushtimit rus të Ukrainës.

Të gjitha ndërtesat e sektorit publik, qendrat tregtare, kinematë, zyrat, hotelet, stacionet dhe aeroportet nuk do të lejohen të ulin temperaturën nën 27 gradë Celsius në verë, ndërsa në dimër nuk do të jetë më e lartë se 19 gradë Celsius.

Ky vendim është miratuar në seancën e Qeverisë në Madrid dhe është bërë i ditur të hënën vonë nga Ministrja e Tranzicionit Ekologjik, Teresa Ribera. Masa e përmendur do të jetë e vlefshme deri më 1 nëntor 2023. Ribera tha se është një paketë fillestare që është e nevojshme në një situatë kritike sepse Evropa ka nevojë për ndihmën e Spanjës.

Masat përfshijnë gjithashtu rregulla që dyqanet dhe bizneset të mbajnë dyert e tyre të mbyllura duke përdorur një sistem automatik që duhet të instalohet deri më 30 shtator. Qëllimi i kësaj, pretendon qeveria, është të parandalojë daljen e ajrit të nxehtë ose të ftohtë nga një hapësirë e nxehtë ose e ftohur.

Ndriçimi në zyrat e papërdorura, vitrinat e dyqaneve dhe monumentet duhet të fiket pas orës 22:00 dhe do të fillojë kontrolli i efiçencës së energjisë në disa ndërtesa. Ribera i bëri thirrje sektorit privat që të rrisë pjesën e punës nga shtëpia.

Spanja po merr këto dhe masa të tjera, që do të vendosen pas pushimit veror, për të përmbushur angazhimet e marra në planin evropian të emergjencës, të rënë dakord javën e kaluar.

 

---