Si planifikon kantoni i Jurës të ulë kostot e sigurimit shëndetësor?

(KEYSTONE/Christian Beutler)

Kantoni i Jurës po përballet me rritje të forta të primeve të sigurimit shëndetësor, veçanërisht për vitin 2025, ku ka shënuar rritjen më të madhe në zonën frëngjishtfolëse të Zvicrës, me 8.9% më shumë se një vit më parë, shkruan RTS, transmeton albinfo.ch.

Për të ndaluar këtë trend shqetësues, autoritetet kantonale po përqendrohen në forcimin e kujdesit parësor për të moshuarit, duke synuar uljen e përdorimit të shërbimeve të urgjencës dhe shtrimeve në spital. Në Jura, të moshuarit konsultohen më pak me mjekët e familjes sesa në kantone të tjera, gjë që po rrit kostot e kujdesit.

Departamenti i Ekonomisë dhe Shëndetësisë po nxit projekte për kujdesin në shtëpi dhe bashkëpunimin midis mjekëve, siguruesve dhe organizatave të promovimit të shëndetit. Edhe pse mungesa e mjekëve të përgjithshëm ishte një problem viteve të fundit, situata po përmirësohet.

Megjithatë, përkundër këtyre përpjekjeve, pritet që vitin e ardhshëm të ketë një rritje të re të primeve të sigurimit shëndetësor në kantonin e Jurës, transmeton albinfo.ch.