Sinjale pajtimi nga Brukseli për Zvicrën

Një politikan i lartë i BE-së të premten ka deklaruar se një zgjidhje e mirë në çështjen e përparësisë së vendorëve në tregun zviceran të punës duket e mundshme Këtë deklarim ai e ka bërë duke iu referuar modelit të propozuar nga Qeveria e Zvicrës të “Përparësisë së moderuar të vendorëve”

Zvicra mund të marrë frymë më lehtë. Një politikan i lartë i BE-së të premten ka deklaruar se një zgjidhje e mirë në çështjen e përparësisë së vendorëve në tregun zviceran të punës duket e mundshme, shkruan srf.ch. Këtë deklarim ai e ka bërë duke iu referuar modelit të propozuar nga Qeveria e Zvicrës të “Përparësisë së moderuar të vendorëve”.

Kjo përbën një zgjidhje kompromisi në krahasim me atë të iniciativës kundër migracionit masiv të SVP-së për të cilën zviceranët kanë votuar në vitin 2014.

Politikanët zviceranë të shumicës së partive janë shprehur të lehtësuar pas sinjaleve të lëshimit pe nga BE-ja lidhur me këtë çështje, transmeton albinfo.ch. Kështu, deputetja nga SP/PS në Dhomën e Kantoneve Pascale Bruderer ka deklaruar me këtë rast se “kjo tregon se parlamenti është në rrugë të drejtë”.

Deputeti tjetër i kësaj dhome, Philipp Müller nga FDP/PLR e ka quajtur lajm pozitiv këtë sinjal nga Brukseli. Ai është shprehur i lehtësuar me faktin se propozimi i bërë nga Komisioni i Dhomës së Kantoneve nuk përbën shkelje të marrëveshjeve bilaterale me BE-në.

Edhe kolegu i tyre nga CVP/PDC, Pirmin Bischof e ka vlerësuar si hap pozitiv qëndrimin e zbutur të BE-së. Ai i gëzohet faktit se Brukseli duket se nuk këmbëngul më në jetësimin  e iniciativës kundër migracionit masiv duke e lidhur atë me të ashtuquajturën marrëveshje institucionale kornizë, përcjell albinfo.ch. Ai madje, i trimëruar nga sinjalet pozitive të Brukselit mendon të bëjë një propozim paksa më të ashpër në këtë drejtim!

Siç mund edhe të pritej, vetëm nga SVP/UDC-ja reagimi nuk është pozitiv. Deputeti i kësaj partie Peter Föhn ka thënë me këtë rast se nuk është kurrfarë mrekullie pasi që BE-ja nuk ka çfarë të kontestojë, pasi që propozimet nga Zvicra janë tepër të buta.