Skadon afati i 134 mijë vaksinave anti-Covid në Kosovë

Ministri Vitia tha se atyre u skadoi afati pas dezinformatave ndaj vaksinave Astra Zeneca

134 mijë vaksina Astra Zeneca janë shmangur nga përdorimi nga Ministria e Shëndetësisë në Kosovë pas skadencës së afatit të tyre.

Kjo shkaktoi gjatë ditës debat në opinionin publik, me ç’rast u kritikua Ministria e Shëndetësisë për mungesë të strategjisë së vaksinimit.

Për vaksinat, të cilat u dhuruan si donacion nga Norvegjia për Kosovën, në orët e pasdites mbajti konferencë për media ministri i Shëndetësisë, Arben Vitia, transmeton Albinfo.ch.

Vitia theksoi se nga sot janë hequr nga administrimi 133.234 vaksina nga kompania AstraZeneca, e tërë kjo nga ndikimi i dezinformatave që quan deri te refuzimi i marrjes së këtyre vaksinave.

“Për ne siguria dhe cilësia e vaksinave është parësore, prandaj nuk kemi pasur kompromis në këtë drejtim, dhe nuk do të kemi. Vaksinat që janë në stoqet tona, janë të sigurta dhe për këtë garantojnë mekanizma, si OBSH, ECDC, e mbi të gjitha EMA dhe FDA”, tha Vitia, përcjell tutje Albinfo.ch.

Pavarësisht këtij lajmi, ministri Vitia siguroi se në Kosovë ka vaksina mjaftueshëm.

“Deri në fillim të javës së ardhshme do të marrim 150 mijë vaksina nga Gjermania, dhe përveç kontratës së nënshkruar me Pfizer, dozat e të cilave do të vijnë në fillim të çdo jave, Republika e Kosovës vazhdimisht do të pranojë doza të shumta nga shtetet mike që janë treguar solidar që nga fillimi i pandemisë”, tha ai.

---