Skeleti i rrallë i dinozaurit del në ankand në Paris

Dinozauri i rrallë pritet të shitet mbi një milion euro

 

Mësohet se një skelet dinozauri, i ruajtur jashtëzakonisht mirë, një camptosaurus i njohur si Barry, do të dalë në shitje në Paris muajin e ardhshëm, përcjell albinfo.ch.

Thuhet se dinozauri, i cili daton nga periudha e vonë Jurassic, rreth 150 milionë vjet më parë, u zbulua për herë të parë në Wyoming në vitet 1990. Fillimisht u restaurua në vitin 2000 nga paleontologu Barry James, nga i cili mori emrin, raporton CNN.

Ndërkohë, laboratori italian Zoic, i cili bleu Barryn vitin e kaluar, ka bërë punë të mëtejshme restauruese në skeletin, i cili është 2.1 metra i lartë dhe 5 metra i gjatë.

“Është një ekzemplar jashtëzakonisht i ruajtur, i cili është mjaft i rrallë”, tha Alexandre Giquello, nga shtëpia e ankandeve në Paris Drouot, ku do të bëhet shitja.

“Për të marrë shembullin e kafkës së tij, kafka është e plotë në 90% dhe pjesa tjetër e dinozaurit (skeleti) është e plotë në 80%”, tha ai.

Mostrat e dinozaurëve mbeten të rrallë në tregun e artit, me jo më shumë se dy shitje në vit në mbarë botën, tha Giquello.

Skeleti, i cili do të shfaqet për publikun në mes të tetorit, pritet të arrijë deri në 1.2 milionë euro kur të dalë në shitje më 20 tetor.

---