Sommaruga, bilanc pozitiv nga udhëtimi i saj afrikan

“Marrëveshjet e bëra sigurisht nuk i zgjidhin të gjitha problemet por ato ndihmojnë në këtë drejtim”, ka thënë Sommaruga

Ministrja zvicerane e drejtësisë, Simonetta Sommaruga ka nxjerrë një bilanc pozitiv nga qëndrimi i saj 7 ditor në sisa vende të Afrikës. Këtë konstatim ajo e ka deklaruar të enjten në Bernë pas kthimit të saj nga ky udhëtim. Ajo ka thënë se dy vjet pas fillimit, bashkëpunimi në fushën e migracionit me Nigerinë është duke ecur mirë, me gjithë faktin se ka ende hapësirë për përmirësime. Kështu, për shembull, sipas saj, procesi i riatdhesimit të azilkërkuesve të refuzuar duhet të shkojë më shpejtë.

Sommaruga ka thënë se ka parë në Nigeri persona që kanë përfituar nga ndihmat zvicerane ne kuadër të programit për stimulim të kthimit. Ata kanë mundur të ndërtojnë ekzistencën e tyre mbi këtë ndihmë, ka thënë ajo për mediet zvicerane. Qëndrimi në Afrikë ka vërtetuar edhe njëherë se migracioni është një proces global dhe në këtë kuptim sfidat mund të përballohen me angazhimin e përbashkët me shtetet tjera.

“Marrëveshjet e bëra sigurisht nuk i zgjidhin të gjitha problemet por ato ndihmojnë në këtë drejtim”, ka thënë Sommaruga.

Gjatë qëndrimit në disa shtete të Afrikës, Sommaruga ka nënshkruar marrëveshje migracioni me Kongon dhe me Angolën. Ndërsa në Nigeri ajo ka bërë mbikëqyrjen e funksionimit të programit për ndihma azilkërkuesve të kthyer vullnetarisht nga Zvicra.