Sommaruga, e vendosur kundër abuzimit me azilin

Një nga katër azilkërkuesit të cilëve u është refuzuar qëndrimi, kthehet sërish në Zvicër!

Një nga katër azilkërkuesit të cilëve u është refuzuar qëndrimi, kthehet sërish në Zvicër. Ministrja e drejtësisë, Simonetta Sommaruga është e vendosur që të ndërpresë këtë formë abuzimi.

“Ne kemi bërë një revizion të ligjit pikërisht në këtë fushë dhe kjo do të duhej të sillte thjeshtësim të procedurave. Përmes kësaj zbulohen më lehtë keqpërdorimet”, ka thënë Sommaruga në emisionin 10vor10 të televizionit publik të Zvicrës.

Veç kësaj, ajo ka thënë se me kantonet po punohet për të shkurtuar procedurat e azilit.

Për këtë Sommaruga është frymëzuar, veç tjerash nga vizita që i ka bërë Holandës, ku është njohur me përvojat shumë më efikase të atij vendi lidhur me trajtimin e çështjes së azilit. Procedura e shqyrtimit të lëndëve të azilkërkuesve në Holandë merr shumë më pak kohë se sa në Zvicër dhe ajo është e unifikuar.

Nga ana tjetër, kryetarja e konferencës së drejtorëve kantonalë të drejtësisë dhe të policisë, Karin Keller-Sutter ka kërkuar që të dëbohen kërkuesit e shumëfishtë të azilit.