Sonte, skena e “Swiss Music Awards” në Zvicër do të frymojë shqip

albinfo.ch do të sjell atmosferën e kësaj ngjarje kulturore në Cyrih

Skena muzikore e ndarjeve të çmimeve prestigjioze “Swiss Music Awards” që do të mbahet sonte (e premte) në Zvicër do të frymojë shqip.

Këngëtarja shqiptare që jeton në Londër, e cila po korr sukseset botërore Dua Lipa, është mysafire speciale për të performuar sonte në këtë mbrëmje muzikore, ndërkohë rep këngëtari shqiptar i cili jeton në Zvicër, Shkëlzen Kastrati i njohur si Xen, është i nominuar për çmimin në kategorinë “Best Breaking Act”.

Kur gjithçka është drejt finalizimit për këtë spektakël muzikor, tashmë në Cyrih ka mbërritur edhe e ftuara speciale,  Dua Lipa. Ajo ka njoftuar fansat e saj se gjendet në Zvicër dhe mezi po pret të performojë në ndarjen e çmimeve “Swiss Music Awards”, përcjell “albinfo.ch”.

albinfo.ch do të jetë e pranishme në spektakël dhe do të sjellë për lexuesit e vet atmosferën që mbretëron në këtë eveniment të rëndësishëm muzikor.

Sipas mediave zvicerane, Dua do të këndoj hitin e saj “Be The One” në skenën e “SMA”-së.

“Zvicra, jam shumë e lumtur që gjendem këtu. Do të perfomoj në “Swiss Music Awards”. Jam shumë e emocionuar”, ka shkruar Dua në Instagram.

E në anën tjetër Xeni ka bërë thirrje fansave të tij që të vazhdojnë ta votojnë në linkun e faqës: https://swissmusicaëards.ch/en/#!/vote

albinfo.ch