Sot, protestë spontane kundër ashpërsimit të Ligjit mbi Azilin

FIMM (Forumi për Integrim i Migrantëve) bën apel për një protestë që do të mbahej sot Bernë, si reagim ndaj ashpërsimit të Ligjit mbi Azilin

“Të kundërshtohet politika çnjerërore e azilit” është motoja e protestës të cilën e thërret një komitet i krijuar më parë për protestën tjetër, të planifikuar për 23 qershor në Bernë. Pas ashpërsimit të madh të Ligjit të Azilit, që kishte hyrë në fuqi jo më larg se në vitin 2008, Parlamenti Nacional po debaton më 13 dhe 14 qershor mbi revizionin e 10 të Ligjit mbi Azilin.

Propozimi i përpunuar nga Këshilli Nacional është ashpërsuar edhe më nga komisioni politik i parlamentit“, thuhet në thirrjen për protestë.

Më tutje në apel numërohen pikat të cilat parlamenti tashmë i ka miratuar ose është në miratim e sipër si: heqja e të drejtës së azilit për personat që refuzojnë shërbimin ushtarak, heqja e azilit familjar, heqja e ndihmave sociale për azilkërkuesit, ngritja e kampeve të internimit për azilkërkues dhe ndalimi i kërkimit të azilit në përfaqësitë diplomatike të Zvicrës.

Duke alarmuar për shkeljet e të drejtave të njeriut që, sipas FIMM po bëhen me miratimin e këtij ligji, citon një përfaqësuese të UNHCR-së, Susin Park e cila në një prononcim të saj për gazetën NZZ ka dënuar këtë veprim. “Këto kufizime nuk do të ishin në përputhje me të drejtën ndërkombëtare. Propozimet (për ndryshimin e ligjit) do ta bënin Zvicrën njërin ndër vendet më restriktive të Evropës”, citohet të ketë thënë Susin Park.

Më tutje në apel kritikohen edhe partitë e majta, organizatat tjera dhe sindikatat, të cilat thuhet se nuk janë shprehur të vendosura për të kundërshtuar gjithë këtë ashpërsim. SP-PS për shembull, ka pohuar se referendum do të kërkojë vetëm në rast se u hiqet azilkërkuesve ndihma sociale. Por, kjo nuk mjafton, sepse, për të ndaluar “katastrofën aktuale humanitare në fushë të azilit nevojitet një JO konsekuente për gjithë revizionin e Ligjit mbi Azilin”, thuhet në apel.

Më tutje kërkohet nga SP-PS, të gjelbrit, sindikatat, Flüchtlingshilfe dhe organizatata simotra të tyre që të iniciojnë referendum në secilën rrethanë.

FIMM njofton po ashtu se një grup prej 30 vetash ishte tubuar dje para ndërtesës së Parlamentit Nacional në Bernë për të kërkuar nga deputetët që të mobilizohen dhe angazhohen për të drejtat e refugjatëve dhe azilkërkuesve. Ata me këtë rast u kanë shpërndarë të gjithë deputetëve në mënyrë simbolike letërnjoftimet N (për azilkërkuesit pa status të pranuar), duke ua bërë me dije se ata sot duhej të merrnin një vendim kundër një “politike çnjerëzore të azilit”.

Protesta është thirrur për sot, me fillim në orën 18.00 para Heiliggeistkirche, Bernë.