St. Gallen: Policia rekruton më shumë “super njohës” për të identifikuar kriminelët

Policia zvicerane ka rekrutuar gjashtë të ashtuquajtur “super njohës” në qytetin lindor zviceran të St Gallen për t’i ndihmuar ata të identifikojnë kriminelët.

Disa njerëz kanë aftësinë të identifikojnë menjëherë një fytyrë që e kanë parë vetëm një herë në jetën e tyre. Ky talent, që shkon përtej atij të makinerive, ka tërhequr vëmendjen e policisë së St Gallenit, transmeton albinfo.ch.

Gjashtë persona u zgjodhën, pas testimeve të shumta, për projektin e parë pilot të kësaj shkalle në Zvicër. Të gjithë kanë talent të jashtëzakonshëm për njohjen e fytyrës dhe ata janë në gjendje të njohin një person me kapuç në mes të një turme në lëvizje dhe me një fushë të kufizuar shikimi.

“Së fundmi pata një rast, gjatë një përleshje me thikë. Kur mbërrita në vendngjarje dhe pashë një nga personat e pranishëm, munda ta thërrisja me emër. M’u kujtua që e pashë jashtë disa vite më parë. Madje mund të them se ku ishte”, ka thënë për transmetuesin publik zviceran RTS, një super njohës, i cili punon për policinë e St Gallen.

Zbatimi i ligjit është veçanërisht i interesuar për këto aftësi, sepse ato ofrojnë disa avantazhe mbi një makinë. Për Meike Ramon, drejtoreshë e Laboratorit të Njohjes së Fytyrës në Universitetin e Lozanës, njerëzit janë gjithmonë më të mirë për shkak të fleksibilitetit të tyre në përdorimin e informacionit të marrë.

“Ndryshe nga disa softuer tradicional të zbulimit, nuk kemi nevojë domosdoshmërisht të kemi dy sy, një hundë dhe një gojë që të jemi në gjendje të njohim një fytyrë. Pra, nëse merrni telefonin dhe zmadhoni, do të shihni se ai njeh një fytyrë vetëm në disa raste, por jo në të tjera”, ka thënë ajo .

Një avantazh tjetër i syrit të njeriut ndaj teknologjisë është se ai paraqet më pak probleme ligjore. “Nëse përdorim algoritme, përballemi drejtpërdrejt me ligjin për mbrojtjen e të dhënave. Por nëse përdorim burimet njerëzore, qoftë për prezumimin e pafajësisë apo fajit, nuk e kemi këtë problem”, thotë Stefan Kühne, kreu i policisë kriminale të St Gallen.

Autoritetet e St Gallen duhet të vendosin në fund të vitit nëse këta supernjohës do t’i bashkohen përgjithmonë policisë.