Steinmeier rizgjedhet president i Gjermanisë

Ai ka fituar edhe një mandat 5 vjeçar në krye të shtetit

Presidenti gjerman, Frank-Walter Steinmeier, është rizgjedhur për një mandat të dytë në detyrë, njofton DW.

“Steinmeier mori 1,045 vota nga 1,437 në Konventën Federale të dielën”, njoftoi presidenti i Bundestagut, Bärbel Bas (SPD).
Në këtë seancë merrnin pjesë anëtarë të Bundestagut të Gjermanisë, ose Dhoma e Ulët e Parlamentit, së bashku me një numër të barabartë delegatësh të zgjedhur nga 16 shtetet e vendit, ose Landet, përcjell Albinfo.ch.

Gjatë pranimit të mandatit të dytë pesëvjeçar, Steinmeier tha se mbështet të gjithë ata që promovojnë demokracinë, ndërsa paralajmëroi për një pushtim të mundshëm rus ndaj Ukrainës.

“Ne jemi në mes të rrezikut të një konflikti ushtarak, një lufte në Evropën Lindore”, tha Steinmeier në kongres, duke shtuar se “Rusia mban përgjegjësi për këtë”.

“I bëj thirrje presidentit rus Putin: Lironi unazën rreth qafës së Ukrainës dhe zgjidhni një rrugë që ruan paqen në Evropë”, shtoi ai.

---