Studim alarmues: Deri në 90% e akullnajave mund të zhduken deri në vitin 2100

Foto Ilustrim @Pixabay

Një studim i ri i Institutit Federal Zviceran të Teknologjisë (ETH Zurich) paralajmëron se nga 50% deri në 90% e akullnajave në botë mund të zhduken deri në fund të shekullit, në varësi të nivelit të ngrohjes globale, transmeton albinfo.ch.

Sipas studimit, të publikuar në revistën Nature Climate Change, edhe nëse ngrohja globale kufizohet në 1.5°C, siç parashikohet nga Marrëveshja e Parisit, rreth gjysma e akullnajave aktuale do të zhduken. Nëse temperaturat rriten me 2.7°C, katër nga pesë akullnaja pritet të zhduken, ndërsa në skenarin më të keq, me rritje prej 4°C, do të mbetet vetëm një akullnajë nga dhjetë.

Studiuesit theksojnë se zhdukja e akullnajave nuk është vetëm një çështje mjedisore, por ka pasoja të mëdha kulturore, ekonomike dhe sociale, sidomos për rajonet malore. Zonat më të rrezikuara përfshijnë Alpet, Kaukazin, rajone në Amerikën e Veriut, Azi Qendrore, Ande dhe malet e Afrikës.

Aktualisht, në mbarë botën zhduken rreth 750–800 akullnaja çdo vit, ndërsa deri nga mesi i shekullit kjo shifër mund të rritet në 2,000–4,000 në vit. Në Zvicër, gjatë 30 viteve të fundit janë zhdukur mbi 1,000 akullnaja.

Autorët e studimit theksojnë se vetëm politika të forta dhe ambicioze kundër ndryshimeve klimatike mund të ndihmojnë në ruajtjen e akullnajave të mbetura.