Stuhi të dendura dhe breshër pas netëve tropikale në Zvicër

Foto ilustrim @unsplash

Zvicra ka hyrë zyrtarisht në valën e parë të të nxehtit veror, me pjesë të mëdha të vendit që përjetuan një natë tropikale nga e shtuna në të dielën, ku temperaturat nuk ranë nën 20 gradë Celsius. Në St. Chrischona të Bazelit, termometri shënonte 23 gradë edhe në orën 6 të mëngjesit, ndërsa në Uetliberg të Cyrihut temperaturat mbetën mbi 21 gradë gjatë gjithë natës, shkruan 20minuten, transmeton albinfo.ch.

Sipas MeteoSwiss, të dielën në mëngjes vendi u përfshi nga një rrymë ajri jugperëndimore, e cila solli më shumë lagështi, sidomos përgjatë Maleve Jura. Megjithatë, periudha të gjata me diell u ruajtën në pjesën më të madhe të territorit.

Nga pasditja, priten stuhi të forta nga perëndimi, të shoqëruara me reshje intensive shiu, erëra të fuqishme dhe mundësi për breshër, veçanërisht në zonat kodrinore të Alpeve qendrore dhe lindore. Temperaturat mbeten të larta, me vlera rreth 27 gradë Celsius.

Të hënën, parashikohet një rënie e përkohshme e temperaturave  mëngjesi do të jetë më i freskët me rreth 15 gradë, ndërsa pasdita do të sjellë rritje deri në 23 gradë, e shoqëruar me një fllad të lehtë.

Rikthimi i vapës do të ndodhë që të martën, me diell të bollshëm dhe temperatura që do të ngjiten deri në 26 gradë në zonat e ulëta dhe deri në 29 gradë në Valais dhe Ticino.

Sipas SRF Meteo, kulmi i valës së të nxehtit pritet të mërkurën, kur temperaturat do të arrijnë deri në 30 gradë Celsius, duke shënuar një kthim të plotë të verës në Zvicër, transmeton albinfo.ch.