Sulmohet me thikë kryebashkiaku në lokalin turk, i shpëton jetën pronari i lokalit

Sulmuesi e ka pyetur Hollsteinin: “A je ti kryebashkiaku?” dhe i është drejtuar me ton agresiv: “Mua më lini këtu të vdes etjeje ndërsa i lejoni brenda 200 .000 njerëz të huaj”. Menjëherë pastaj e ka goditur me thikë

Pronari i një restoranti turk me ushqim të shpejtë (Döner) i ka shpëtuar jetën kryebashkiakut Andreas Hollstein të qytetit gjerman Altena, Sauerland.

Politikani i CDU-së në pushtet, është sulmuar me thikë nga një person i dehur, me ç`rast ka pësuar një plagë 15 cm të gjatë në qafë por është jashtë rrezikut për jetën, transmeton albinfo.ch mediet gjermane.

Pas trajtimit, ai është liruar nga spitali.

Mediet gjermane shkruajnë se sulmuesi i alkoolizuar ka bërë kritika të ashpra kundër politikës së refugjatëve në qytetin Altena. Pastaj ai e ka pyetur Hollsteinin: “A je ti kryebashkiaku?” dhe i është drejtuar me ton agresiv: “Mua më lini këtu të vdes etjeje ndërsa i lejoni brenda 200 .000 njerëz të huaj”. Menjëherë pastaj e ka goditur me thikë. Me këtë rast ka ndërhyrë pronari turk, (Demir Abdullah) i cili po ashtu ka pësuar plagë nga thika e sulmuesit, transmeton albinfo.ch. Ai ka treguar kurajë qytetare duke i dalë në ndihmë dhe shpëtuar jetën kryebashkiakut.