Sulmuesi shqiptar, para Ronaldos e Messit

Azdren Llullaku ndodhet në vendin e tretë të golashënuesve më të mirë të Evropës, para shumë yjeve botërorë

Duket e pabesueshme, por është e vërtetë. Një sulmues shqiptar ndodhet në maje të listës së shënuesve më të mirë në Evropë, madje edhe para yjeve botëror si Cristiano Ronaldo, Lionel Messi, Diego Costa, Eden Hazard, Alexis Sanchez, Zlatan Ibrahimoviq e Antoine Griezmann, shkruan albinfo.ch.

Ky është Azdren Llullaku, i cili luan në kampionatin rumun me Gaz Metan. Ai ka shënuar 16 gola këtë sezon, dhe ka grumbulluar 24 pikë, duke u renditur në vendin e tretë.

Më shumë pikë sesa Llullaku, ka vetëm Aubameyang dhe Kabaev. Futbollisti i Dortmundit ka shënuar 15 gola dhe duke u shumëzuar me koeficientin 2, kuota e tij e pikëve shkon në 30.

Kjo e bën atë të kryesojë listën e golashënuesve në garën për “Këpucën e Artë”. I dyti në renditje është Evgjeni Kabaev, i cili, me 25 golat e shënuar që shumëzohen me koeficientin 1, shkon në kuotën e 25 pikëve. I treti është shqiptari, së bashku me Modesten, Mauro Icardin dhe Edin Xhekon.

Ai është shprehur se tani dëshiron të ndihmojë edhe Kombëtaren shqiptare, derisa ka zbuluar edhe disa oferta në drejtim të tij.