Swisscom rrit çmimet e abonimeve private nga prilli

(KEYSTONE/Til Buergy)

Pas operatorëve Sunrise dhe Salt, gjigandi i telekomunikacionit Swisscom njoftoi të martën se do të rrisë çmimet e disa abonimeve për klientët rezidencialë duke nisur nga 1 prilli. Çmimi mujor i abonimeve për internet dhe telefoninë mobile do të rritet me 1.90 franga zvicerane, ndërsa për televizionin dhe telefoninë fikse me 90 centime.

Ky ndryshim vlen si për klientët e rinj, ashtu edhe për ata ekzistues, njoftoi Swisscom në një komunikatë për shtyp. Janë të përjashtuara ofertat e shërbimit universal, abonimet prepaid, si dhe abonimet mobile vetëm për të dhëna dhe për fëmijë.

Klientët e prekur do të njoftohen në ditët e ardhshme me email ose përmes një shënimi në faturë. Nëse nuk bien dakord me rritjen e çmimeve, ata do të kenë mundësinë të ndërpresin kontratën para kohe.

Arsyeja e rritjes së çmimeve

Swisscom shpjegon se kjo rritje çmimesh është një përgjigje ndaj ndryshimeve strukturore në tregun e telekomunikacionit. “Ndërkohë që klientët kanë parë një rritje të fuqisë së abonimeve të tyre në vitet e fundit (ndonjëherë deri në 20 herë), çmimet kanë vazhduar të bien, ndryshe nga të gjitha sektorët e tjerë. Kjo ka shkaktuar një ulje të të ardhurave totale, si dhe të ardhurave për klient.”

“Kjo ulje e të ardhurave në tregun e telekomunikacionit nuk mund të kompensohet më vetëm me ulje kostosh dhe përmirësim të efikasitetit,” thekson kompania. Prandaj, Swisscom e konsideron këtë rritje çmimesh “të nevojshme për të ruajtur nivelin më të lartë të cilësisë së shërbimit.”

Investime të vazhdueshme

Swisscom nënvizon se “vazhdimisht po investon në zgjerimin, modernizimin dhe mirëmbajtjen e rrjeteve mobile dhe optike.” Deri në vitin 2025, kompania ka alokuar rreth 1.7 miliardë franga zvicerane për rrjetet dhe infrastrukturën e teknologjisë së informacionit në Zvicër.

Rezultatet financiare të grupit për vitin 2025 pritet të publikohen më 12 shkurt. Për nëntëmujorin e parë të vitit të kaluar, fitimi neto ishte 998 milionë franga, duke shënuar një rënie prej 23% krahasuar me një vit më parë. Swisscom shpenzoi një shumë të konsiderueshme në tremujorin e tretë për të vazhduar integrimin e operatorit Vodafone Italia, i cili u ble në fund të vitit 2024.