Swisscoy, në Kosovë deri në vitin 2017?

Veç kësaj, qeveria e vendit ka kërkuar ngritjen e numrit të pjesëtarëve të misionit ushtarak në Kosovë nga 220 në 235 trupa

Këshilli Federal i Zvicrës planifikon që praninë e misionit ushtarak zviceran në Kosovë ta vazhdojë deri në vitin 2017. Ai ia ka dërguar parlamentit një kërkesë të tillë për miratim. Veç kësaj, qeveria e vendit ka kërkuar ngritjen e numrit të pjesëtarëve të misionit ushtarak në Kosovë nga 220 në 235 trupa.

Kjo ngritje, sipas një komunikate të publikuar të premten nga Departamenti i Mbrojtjes duhet bërë në mënyrë që misioni zviceran të jetë në gjendje të realizojë detyrat për të cilat është marrë vesh me KFOR-in.

Në situata të jashtëzakonshme, kontingjenti mund të rritet përkohësisht. Aktualisht kjo rritje mund të shkojë deri në 60 ushtarë dhe për jo më shumë se për katër muaj. Deri më tash ka qenë e mundur që shtimi i kontingjentit të arrinte deri në 80 ushtarë dhe të zgjaste deri në një vit.

Këshilli Federal e ka mbështetur qëndrimin e tij për vazhdimin e misionit ushtarak në Kosovë me “interesin e pandryshuar të Zvicrës për një Kosovë pa dhunë, pasi që stabiliteti i Ballkanit perëndimor është i lidhur drejtpërdrejtë me sigurinë e Zvicrës”.

Për faktin se misioni është i karakterit të armatosur dhe zgjat më shumë se tri javë, ai duhet të miratohet nga të dyja dhomat e parlamentit.

Misioni Swisscoy, si pjesë e KFOR-it është i pranishëm në Kosovë që nga viti 1999. Nga fillimi deri më tash në këtë mision kanë marrë pjesë rreth 5400 ushtarë në mënyrë vullnetare. Ushtria e Zvicrës gëzon në Kosovë autoritet të lartë dhe besim, shkruan veç tjerash departamenti i mbrojtjes në komunikatën e tij.