Sylvinho, i kënaqur me përgatitjen e kuqezinjve

https://fshf.org/

Sylvinho është shprehur i kënaqur me punën e lojtarëve në ndeshjen miqësore që të premten luajti kombëtarja e Shqipërisë kundër Azerbajxhanit.

“Sa i përket kësaj periudhe, patjetër jam i kënaqur. Kemi bërë tri ditë përgatitje në Tiranë dhe jemi këtu më shumë se një javë. Kemi luajtur edhe miqësoret dhe jam i kënaqur me ecurinë”, ka thënë trajneri i Kuqezinjve.

Ai u shpreh po ashtu që tash përgatitja do t’i kushtohet ndeshjes ndaj Italisë.

“Ditët po afrohen për Euro dhe nesër nisemi për Gjermani. Vjen puna më e madhe dhe momenti më i rëndësishëm. Periudha nga tani e tutje do t’i kushtohet ndeshjes me Italinë. Deri më tani e rëndësishme ishte të shohim gjendjen e lojtarëve dhe të menaxhojmë atë”, shtoi ai.

Sa u përket startuesve, shprehet se nuk është i sigurt.

“Nuk e di nëse lojtarët që startuan sonte do të startojnë ndaj Italisë. Kemi edhe shtatë ditë për të punuar. Kemi shumë punë për të bërë dhe nuk mund të them tani cili do të jetë formacioni. Është shumë e rëndësishme që Jasir Asani të luajë pasi ka luajtur pak. Kemi provuar edhe lojtarë tjerë dhe mënyra tjera të lojës”, ka thënë Sylvinho pas ndeshjes.