Takim i ri i kryenegociatorëve në Bruksel

Kryenegociatorët e Kosovës dhe Serbisë, Besnik Bislimi dhe Petar Petkoviq, po zhvillojnë një tjetër raund bisedimesh në Bruksel, të ndërmjetësuar nga Bashkimi Evropian, si pjesë e përpjekjeve për të çuar përpara dialogun mes dy vendeve, transmeton albinfo.ch.

Ky takim vjen si vazhdimësi e takimeve të ndara që të dy palët kishin javën e kaluar me emisarin e posaçëm të BE-së për dialogun, Peter Sorensen. Atëherë, takimi trilateral kishte dështuar të mbahej për shkak të problemeve logjistike nga pala serbe gjatë udhëtimit për në Bruksel, siç kishte deklaruar Bislimi.

Kryenegociatori i Kosovës, Besnik Bislimi, theksoi se në këtë raund i ka paraqitur Sorensenit qasjen që Kosova do të ndjekë në fazat e ardhshme të dialogut, si në nivelin e kryenegociatorëve, ashtu edhe në takimet e ardhshme të nivelit të lartë, që pritet të udhëhiqen nga shefja për Politikë të Jashtme dhe Siguri e BE-së, Kaja Kallas.

Nga ana tjetër, përfaqësuesi i Serbisë, Petar Petkoviq, ka theksuar se Asociacioni i komunave me shumicë serbe mbetet tema qendrore për Beogradin, duke mohuar se do të diskutojnë për çështjen e Luginës së Preshevës, siç kishte përmendur Bislimi më herët, transmeton albinfo.ch.