Takimi i mësuesve të diasporës

Qendra e Botimeve për Diasporën fton mësuesit që jetojnë e punojnë në diasporë që të marrin pjesë në Takimin Mbarëkombëtar të Mësuesve nga Diaspora më 14 mars

Është bërë e ditur se takimi i Mësuesve të Diasporës organizohet nga Qendra e Botimeve për Diasporën, nën kujdesin e veçantë të Ministrit të Shtetit për Diasporën, z. Pandeli Majko, dhe në bashkëpunim me Ministrinë e Arsimit, Sportit dhe Rinisë, transmeton albinfo.ch.

Qendra e Botimeve për Diasporën fton mësuesit që jetojnë e punojnë në diasporë që të marrin pjesë në Takimin Mbarëkombëtar të Mësuesve nga Diaspora më 14 mars në Tiranë.

Ky aktivitet do të ndihmojë në njohjen, promovimin dhe fuqizimin e bashkëpunimit ndërmjet mësuesve të diasporës dhe vendit amë. Takimi synon diskutimin e procesit të mësimdhënies në diasporë, ndërtimin e urave të qëndrueshme të komunikimit me mësuesit e diasporës, si përcjellës të rëndësishëm të gjuhës, traditës dhe kulturës shqiptare te brezat e rinj që jetojnë në mërgatë.

Ky takim ka për qëllim diskutimin e problematikës së teksteve të mësimit dhe literaturës që përdoret nga mësuesit në diasporë, metodologjinë e mësimdhënies dhe sfidat me të cilat ballafaqohen mësuesit në shkollat e komunitetit shqiptar jashtë vendit, me objektiv kryesor rritjen e bashkëpunimit të komuniteteve shqiptare dhe institucioneve shtetërore përgjegjëse për arsimin dhe diasporën, me qëllim mbështetjen e mësimdhënies së gjuhës shqipe në mërgatë, shkëmbimin e përvojave të arrira, si dhe zgjidhjen e problematikave të ndryshme. /Albinfo.ch

---