Taulant Xhaka kërkohet nga disa skuadra evropiane

Borussia Dortmund, Schalke, Borussia Monchengladbach dhe Valencia po kërkojnë mesfushorin e Baselit, Taulant Xhakën

Mesfushori i Kombëtares shqiptare, Taulant Xhaka mund të largohet nga kampioni i Zvicrës, Basel, shkruan albinfo.ch.

Sipas mediave ndërkombëtare, Taulant Xhaka ka disa oferta joshëse nga Bundesliga gjermane, që mund ta largojnë atë nga Basel.

Për shërbimet e 25-vjeçarit janë emra të rëndësishëm të futbollit evropian, si Borussia Dortmund, Schalke e Borussia Monchengladbach në Gjermani. Negociatave që nuk kanë marrë petkun zyrtar, i shtohet edhe Valencia në Spanjë.

Xhaka është prej 15 vjetësh te Baseli, duke kaluar nga skuadrat e akademisë deri në skuadrën e parë në Superligën zvicerane dhe me vetëm një sezon huazim te Grasshopper.

Ai ka kontratë me klubin deri në vitin 2021, por nëse dikush e çon ofertën në 15 milionë euro dhe lojtari është dakord, transferimi potencial mund të bëhet që në janar.

Kështu arkat e kampionëve të Zvicrës do të shtoheshin me një bonus të majmë dhe Xhaka mund të bënte një lëvizje që do ta ngrinte karrierën e tij në një tjetër nivel.