“Të gjithë e duan Shaqirin”

“Ai është një djalosh i shkëlqyeshëm. Jo vetëm në fushën e lojës, por edhe në dhomën e zhveshjes. Të gjithë e duan Shaqirin”, deklaroi Klopp

Xherdan Shaqiri e nisi për herë të parë një ndeshje nga fillimi për Liverpoolin, që mundi Southamptonin me rezultat 3:0.

Edhe pse nuk shënoi, Shaqiri, kontribuoi në dy golat e vendase, por befasisht u ndërrua pas pjesës së parë, shkruan albinfo.ch.

Trajneri Jurgen Klopp ka treguar pse është zëvendësuar Shaqiri. “I thash Shaqirit se nuk kam zëvendësuar kurrë më parë në pushim të ndeshjes një futbollist që kishte rezultuar kaq vendimtar në pjesën e parë të lojës, por ne kërkonim të kishim më shumë kontroll mbi lojën. Ai nuk ishte i dëmtuar. Shaqiri është një djalosh fantastik”, është shprehur Klopp.

Ai sikur është penduar për Shaqirin, që ka luajtur shumë pak këtë sezon. “Ai është një djalosh i shkëlqyeshëm. Jo vetëm në fushën e lojës, por edhe në dhomën e zhveshjes. Të gjithë e duan Shaqirin. Duhet të kishte luajtur më shumë, megjithatë, sezoni është i gjatë”, ka thënë trajneri gjerman.

---