Temperaturat globale po rriten me ritme të shpejta, viti 2025 drejt një rekordi historik

Viti 2025 po shënon temperatura jashtëzakonisht të larta, duke u renditur mes viteve më të nxehta të regjistruara ndonjëherë dhe duke iu afruar nivelit rekord të vitit 2023.

Sipas të dhënave të fundit nga Copernicus, temperaturat mesatare globale për periudhën janar–nëntor rezultojnë 0.60°C më të larta se mesatarja e viteve 1991–2020 dhe 1.48°C mbi nivelin para-industrial (1850–1900).

Viti i vetëm që ka shënuar temperatura më të larta se 2025 është 2024, i cili për herë të parë ka tejkaluar kufirin 1.5°C mbi nivelet para-industriale.

Nëntori ndër më të nxehtët e regjistruar

Nëntori 2025 është klasifikuar si nëntori i tretë më i ngrohtë në nivel global. Kjo rritje lidhet me temperaturat jashtëzakonisht të larta në veri të Kanadasë dhe në rajonin e Arktikut. Motet ekstreme vijuan në disa zona të botës, përfshirë ciklonet tropikale në Azinë Juglindore që shkaktuan përmbytje të mëdha dhe dëme të konsiderueshme.

“Nëntori i këtij viti ishte 1.54°C më i ngrohtë se periudha para-industriale,” deklaroi Samantha Burgess nga Copernicus.

Specialistët theksojnë se mesatarja e temperaturave për vitet 2023–2025 pritet të kalojë pragun 1.5°C për herë të parë në histori.

Paralajmërimet e ekspertëve

Sipas Burgess, këto të dhëna konfirmojnë se ndryshimet klimatike po përshpejtohen ndjeshëm dhe se mënyra e vetme për të frenuar rritjen e temperaturave mbetet ulja e shpejtë dhe e qëndrueshme e gazeve serrë.