Tentoi të fuste në Kosovë mbi 8 mijë monedha 2 frangëshe false, arrestohet një person në kufi

Një sasi e konsiderueshme monedhash të dyshuara si të falsifikuara është kapur mbrëmjen e së shtunës në pikën kufitare Hani i Elezit, hyrje, gjatë një kontrolli rutinë të Policisë së Kosovës në bashkëpunim me Doganën e Kosovës, raporton albinfo.ch.

Rreth orës 21:15, zyrtarët kufitarë kanë ndaluar për kontroll një veturë të tipit Audi A2, ngjyrë e gjelbër metalike, me targa të Republikës së Maqedonisë së Veriut. Vetura drejtohej nga një shtetas maqedonas me inicialet S. Xh., i lindur në vitin 1981 në Shkup.

Pas verifikimit fillestar të dokumentacionit, automjeti është përzgjedhur për një kontroll të detajuar. Gjatë këtij kontrolli, nën ulëset e përparme dhe në pjesë të tjera të fshehta të veturës janë zbuluar disa qese plastike të mbushura me monedha metalike 2 franga zvicerane (CHF), të dyshuara si të falsifikuara.

Sipas Policisë, pas inventarizimit paraprak janë sekuestruar gjithsej 8 076 monedha që kapin shumën prej 16 152 CHF.

Në vendin e ngjarjes kanë ndërhyrë njësitet përkatëse policore dhe hetuesit rajonalë. Me urdhër të Prokurorit për Krime të Rënda, i dyshuari është ndaluar për 48 orë, ndërsa ndaj tij është iniciuar procedurë penale për veprën “Falsifikim i parasë”.

Automjeti dhe monedhat janë sekuestruar si dëshmi materiale, ndërsa hetimet po vazhdojnë nga njësitë kompetente.

Policia e Kosovës thekson se, në bashkëpunim të vazhdueshëm me Doganën, mbetet e përkushtuar në parandalimin dhe luftimin e të gjitha formave të kriminalitetit ndërkufitar, duke theksuar rëndësinë e mbrojtjes së sistemit financiar dhe sigurisë publike në vend, raporton albinfo.ch.