Tërnava i uron besimtarët për muajin e Ramazanit

Kryetari i Bashkësisë Islame të Kosovës, Naim Tërnava, në fjalimin e tij drejtuar besimtarëve mysliman me rastin e fillimit të muajit të shenjt të Ramazanit, ka uruar që të gjithë besimtarët të kenë agjërim sa më të lehtë e të pranuar tek Zoti.

Më ketë rast tërnava ka bërë thirrje për paqe, dashuri, mëshirë e unitet. Ai ka thënë se muaji i Ramazanit është muaj i kultivimit të paqes, mëshirës, faljes e pendimit dhe si i tillë është një nga ibadetet, të cilin besimtarët e fesë islame e kryejnë për hir të Allahut.

Sipas myftiut Tërnava, një besimtar që i zbaton këto parime në jetën e tij, është njeri i sjellshëm, modest, i drejtë, i besueshëm dhe me të cilin është e lehtë të krijohen marrëdhënie të mira. Kryetari i BIK-ut me këtë rast ka shtuar se edhe pas 12 vjetësh të mbarimit të luftës, Kosova po falë dëshmorë për realizimin e sovranitetit të plotë të saj, prandaj sipas tij tani më shumë se kurrë vendit i duhet uniteti, e përkushtimi për realizimin e të drejtës së tij të plotë.

Ramazani nisë nesër, më 1 gusht, sipas librit të shenjt të besimtarëve islam, Kuranit, i cili citon fjalët e Allahut, është muaji në të cilin zbriti Kurani, që është udhërrëfyes për njerëz dhe sqarues i rrugës së drejtë dhe dallues i të vërtetës nga gënjeshtra.