Testi për patentë-shoferë, nën vëzhgimin e kamerave

Testimi teorik dhe ai praktik për patentë-shofer, tash e tutje do të bëhet nën monitorimin e kamerave

Tetë vjet pas pavarësisë së Kosovës, sektori më i dyshimtë për keqpërdorime, ai i patentë-shoferëve është bërë transparent. Në sallën ku mbahen provimet me shkrim, janë vendosur kamerat nga Ministria e Infrastrukturës për të përcjell çdo lëvizje dhe keqpërdorim të mundshëm të kandidatëve dhe ekzaminerëve.

Inaugurimi i këtij projekti është bërë sot në njësinë e Patentë shoferëve në Prishtinë nga ministri i ministri, Lutfi Zharku, i cili ka parë nga afër testimin e sistemit të kamerave monitoruese në këtë qendër.

Krejt ky sistem po bëhet për shkak të ankesave që ka pranuar Ministria e Infrastrukturës se aty zhvillohej korrupsioni.

“Po e bëjmë prezantimin e punës tonë që ka të bëjë me rritjen e transparencës dhe që kontribuon në rritjen e sigurisë në komunikacion. Ne së pari kemi filluar me montimin e kamerave nëpër salla ku mbahet testimi teorik, ndërsa javën e kaluar kemi filluar edhe me përdorimin e kamerave në testimin praktik”, deklaroi ai.

Gjatë muajit prill, sipas ministrit të Infrastrukturës, do të fillojmë me një fazë shumë më të madhe të rritjes së kontrollit apo rritjes së cilësisë së testimit. “Do të kalojmë në fazën e testimit elektronik, në prill besoj”, tha Zharku, sipas të cilit, instalimi i kamerave ka kushtuar 25 mijë euro, ndërsa vlera para-llogaritare e testimit elektronik, do të arrijë deri në 500 mijë euro.