Tifozët i fishkëllejnë sulmuesit shqiptar në Gjermani

Tifozët e skuadrës e vërshëllyen sulmuesin shqiptar për shkak të paraqitjes së tij të dobët

Edmond Kapllani assesi të këndellet. Ai ka përfunduar në Ligën e Katërt të Gjermanisë, derisa dy vite më parë ishte pjesë e Kombëtares shqiptare. Kapllanit aktivizohet në kategorinë e katërt gjermane, në rajonin jug-perëndimor me skuadrën e Elverzberg, shkruan albinfo.ch.

Në takimin e fundit në kampionat, në të cilin ekipi i tij barazoi pa gola përballë Valldorf, tifozët e skuadrës e vërshëllyen sulmuesin shqiptar për shkak të paraqitjes së tij të dobët. Ai ka shënuar gjashtë gola në këtë sezon, dhe është golashënuesi i dytë më i mirë i ekipit të tij, por duke qenë se është një emër i madh për nivelin e kategorisë së futbollit ku luan, tifozët presin më shumë nga ai.

“Mund ta përballoj dhe ta tejkaloj diçka të tillë me eksperiencën që kam, por të them të drejtën u befasova”, është shprehur Kapllani pas ndeshjes.

Kapllani pasi mbylli aventurën e tij me FSV Frankfurt në Bundësligën e dytë, zgjodhi të qëndronte në Gjermani, edhe pse në një ligë shumë inferiore. Para dy vitesh, sulmuesi ishte në stolin rezervë të kombëtares në fitoren historike 0:1 në Portugali.