Tifozët “Kuq e Zi” lihen pa bileta, reagojnë ashpër: Hakmarrje tipike nga ana e FSHF-së, në këto 21 vite

'Pa bileta për herë të parë pas 21 vitesh', 'Tifozat Kuq e Zi': Hakmarrje tipike e FSHF, nuk duam Evropianin me Serbinë

Tifozët “Kuq e Zi” kanë njoftuar se kanë mbetur pa bileta për herë të parë që nga krijimi i tyre.

Kjo pasi Federata Shqiptare e Futbollit nuk ka bërë prenotimet, me arsyen se kërkon më shumë gjithëpërfshirje në stadium, transmeton albinfo.ch.

Rinor Qyqalla, përfaqësuesi i Tifozëve Kuq e Zi (TKZ) në Gjermani, ka bërë të ditur për platformën Albinfo.ch se tifozët nuk kanë bileta të rezervuara për ta dhe se, për herë të parë pas 21 vitesh veprimtari të Tifozëve Kuq e Zi, janë lënë pa bileta. Arsyetimi nga FSHF ka qenë se duan gjithëpërfshirje.

“Vendimi i Federatës Shqiptare të Futbollit (FSHF) për të mos na dhënë më bileta të pararezervuara, si grupi më i madh dhe më i përhershëm i përkrahësve të Kombëtares, është një goditje e rëndë që prek jo vetëm veprimtarinë tonë si TKZ, por edhe një çështje parimore të drejtësisë dhe transparencës”, shprehet Qyqalla.

Mbështetësit kuqezinj pretendojnë se kjo është një hakmarrje, pasi dolën haptazi kundër organizimit të Evropianit U-21 me Serbinë.

“Për më tepër, ne e shohim këtë vendim si një hakmarrje të drejtpërdrejtë për qëndrimin tonë kritik ndaj kampionatit të përbashkët me Serbinë dhe si një përpjekje për të na heshtur. Arsyeja e pretenduar për ‘gjithëpërfshirje’ po përdoret nga FSHF-ja për të na përjashtuar, ndërkohë që çmimet e larta të biletave e bëjnë të pamundur për tifozët e zakonshëm të marrin pjesë në ndeshje.

Ne dëshirojmë ta bëjmë këtë çështje publike dhe të tregojmë se si do të vazhdojmë të përkrahim Kombëtaren, me ose pa mbështetjen e FSHF-së. Për Albinfo-n, kjo është një temë me interes të madh, sepse prek lirinë e mendimit dhe të drejtën e përkrahësve më besnikë për të qenë pranë Kombëtares. Jemi të gatshëm t’ju ofrojmë të gjitha informacionet e nevojshme dhe do të vlerësonim jashtëzakonisht shumë nëse do të na jepnit një platformë për të paraqitur pikëpamjet tona”, shprehet Rinor Qyqalla, përfaqësues i Tifozëve Kuq e Zi në Gjermani. /Albinfo.ch

---