Tiranë, protestë në mbrojtje të parkut

Protestuesit shqiptarë janë përleshur me policinë, ndërsa disa nga ta janë shoqëruar në stacionin e Policisë. Shkas u bë ndërtimi i një parku të lojërave në parkun e liqenit

Dhjetëra aktivistë të shoqërisë civile kanë protestuar të dielën në Tiranë, kundër vendimit të Bashkisë së kryeqytetit për ndërtimin e një parku të lojërave në afërsi të liqenit artificial. Protestuesit janë përleshur me Policinë, ndërsa disa nga ta janë arrestuar dhe shoqëruar në komisariatin e Policisë.

Aktivistët pretendojnë se projekti ka nisur të ndërtohet në shkelje të ligjit, por Bashkia e Tiranës e kundërshton duke theksuar se punimet për parkun kanë nisur në momentin që është dhënë leja e ndërtimit përkatëse.

Siç njoftojnë mediet nga Tirana, shtatë protestues u ndaluan dhe u shoqëruan në Komisariati e Policisë në kryeqytet, ndërsa ndaj tyre është paralajmëruar procedura të rregullta gjyqësore. Madje një aktivist është sulmuar me grushte nga një oficer i policisë, për të cilin pasuan reagimet, raporton Albinfo.Ch.

Ndërtimi i parkut të fëmijëve në Kodrat e Liqenit në Tiranë është kundërshtuar edhe nga Partia Demokratike, e cila ka paralajmëruar një protestë për të hënën. Përmes një komunikate për media, PD-ja dënon, siç thuhet, ashpër dhunën e ushtruar ndaj të rinjve, ndaj të moshuarve, burrave e grave të Tiranës, “që kanë dalë në mbrojtje të pasurisë së tyre, kanë dalë në mbrojtje të Parkut të Liqenit”.

Ndryshe, Liqeni Artificial dhe parku afër tij, është vendi më rekreativ i kryeqytetit shqiptar. Ai është i mbrojtur me ligj.