Trafikim organesh nuk ka pasur, krime po

Prokurori Clint Williamsen, nuk ka gjetur asnjë fakt se ka pasur trafikim organesh në të ashtuquajturën “Shtëpi e Verdhë”, por siç thuhet, ka pasur serbë të vrarë dhe të zhdukur

Kryeprokurori i Task-Forcës speciale, Clint Williamsen, ka përfunduar vizitën në Prishtinë e Beograd, por nuk ka dhënë asnjë detaj lidhur me pretendimet e Dick Martyt. Por, thuhet se Willimasen nuk ka gjetur fakte se ka pasur trafikim organesh në Kosovë dhe Shqipëri nga ana e UÇK-së, ndërsa ka dyshime për krime ndaj civilëve serbë.

Siç raportojnë mediet në Prishtinë, të paktën dhjetë ish eprorë dhe gueril të ish-UÇK-së, mund të përballën me drejtësinë nën akuzën për krime të luftës.

Madje thuhet se Williamsen, nuk ka gjetur asnjë fakt se ka pasur trafikim organesh në të ashtuquajturën “Shtëpi e Verdhë” në veri të Shqipërisë, por ka pasur serbë, civil të vrarë dhe të zhdukur gjatë dhe pas luftës së vitit 1999.

Aktakuza, siç raporton “Koha” përshinë disa eprorëve të UÇK-së nga zona e Rahovecit, të cilët dyshohet se janë përfshirë në zhdukjen e një numri të madh serbësh të fshatit  Zoqishtë. Këta ish-guerilë nuk do të akuzohen derisa nuk do të nisë punën Gjykata për Krime të Luftës.  

Siç thuhet më tej në artikull, aktakuza përfshinë vrasjen e civilëve, torturim dhe mbajtjen e tyre në kushte çnjerëzore, por jo edhe heqjen e organeve, siç e ka përmendur senatori zviceran Dick Marty në raportin e tij. Aktakuza do të ketë përgjegjësi individuale dhe jo komanduese.

Në bazë të kësaj, kryeministri në detyrë dhe ish drejtori i Drejtorisë Politike të UÇK-së, Hashim Thaçi do të shpëtoj nga përgjegjësia. Mirëpo, kësaj përgjegjësie nuk do t’i ikin dy eprorë të ish UÇK-së, që kanë shërbyer në rajonin e Rahovecit, ku edhe dyshohet se janë zhdukur qindra serbë.

Ndryshe, prokurori amerikan Williamsen, pas tri vjet hetimesh, javën e ardhshme do ta publikoj në Bruksel raportin e tij, në një konferencë mediesh. Ky raport, përfundimisht hedh dritë, nëse UÇK është përfshirë në trafikim organesh në Kosovë dhe Shqipëri gjatë periudhës së luftës (1998-1999), apo jo.