Trajneri i futbollit largohet nga Kosova, shkon në Gjermani për të punuar

Ai është larguar për shkak të kushteve të këqija, derisa shkon në Gjermani për të punuar

Ndihmëstrajneri i Istogut, Mehdi Arifaj është larguar nga klubi futbollistik Istogu, pasi që të premten (sot) udhëton drejt Gjermanisë. Ai emigron drejt Gjermanisë për të punuar, ka njoftuar faqja e Istogut në rrjetet sociale.

“Kriza e madhe që e ka kapluar Kosovën, po detyron të rinjtë kosovarë që të emigrojnë drejtë shteteve evropiane për të gjetur një punë. Shumë sportistë kosovarë tashmë kanë lënë aktivitetin e tyre në Kosovë dhe kanë emigruar jashtë Kosovës, për të kërkuar një jetë më të mirë”, shkruan faqja e Istogut, përcjell albinfo.ch.

“Qytetarë të komunës së Istogut, kryesi e klubit, trajnerët, lojtarët, tifozët istogas ‘Gjimmat’ dhe dashamirë të futbollit, ju falënderoj nga zemra për përkrahjen që kisha këto 18 vite sa isha pjesë e klubit. Në këtë klub jam rritur, kam kaluar momentet më të bukura të jetës time si lojtarë po ashtu edhe si trajnerë. Nga sot unë nuk jam pjesë e klubit, sepse rruga ime tash është për Gjermani, ku do të shkojë për të punuar. Edhe një herë faleminderit për gjithçka, KF Istogu do të mbetet gjithmonë si pjesë e familjes time.

Suksese, ju priftë e mbara”, ka thënë Mehdi Arifaj pas largimit të tij nga klubi.

Edhe klubi i futbollit Istogu e ka falënderuar atë, duke i uruar suksese në të ardhmen.