Tregtarët protestojnë kundër taksës në Rrugën e Kombit

Në pankarta shkruhet thënia e Faik Konicës “Ruaje Zot Shqipërinë nga Shqiptarët”, dhe "ne po vendosim kufi, nuk po e heqim atë"

Tregtarët e Kosovës dhe Shqipërisë kanë protestuar në pikë-kalimin kufitar në Morinë kundër pagesës për të qarkulluar në rrugën e Kombit, që do të nisë të aplikohet nga 15 prilli.

Protestës i janë bashkuar dhjetëra tregtarë të cilët në shenjë proteste parkuan kamionët në të dy anët e doganës, duke krijuar një varg prej disa kilometrash, përcjell albinfo.ch.

Në protestë morën pjesë importues të kripës, hekurit e prodhimeve të tjera shqiptare.

Ata mbanin në duar pankarta, kundër taksës së Rrugës së Kombit dhe të tjera ku ironizonin vendimet e dy qeverive për forcimin e bashkëpunimit ekonomik.

Në pankarta shkruhet thënia e Faik Konicës “Ruaje Zot Shqipërinë nga Shqiptarët”, dhe “ne po vendosim kufi, nuk po e heqim atë”. Tregtarët thanë se do kthehen bosh në vendet e punës, duke bojkotuar ngarkesat me mallra në Shqipëri. Ata kanë paralajmëruar ndërprerjen e shkëmbimeve tregtare me Shqipërinë për shkak të taksës në “Rrugën e Kombit”.