Treni-autobus prodhohet në Japoni

Alin Andersen @onixion

Një automjet me funksion të dyfishtë, autobus dhe tren, që mund të lëvizë si në rrugë dhe në shina, do të fillojë të përdoret në qytetin Kaijo, në prefekturën Tokushima të Japonisë.

Mjeti, që ngjan me një autobus të vogël, ecën mbi goma normale kur ndodhet në rrugët tradicionale dhe kur mbërrin në stacionin e këmbimit, rrota hekuri zbresin nga barku i tij, duke e kthyer atë në tren.

Rrotat e trenit zëvendësojnë gomat e përparme, ndërsa ato të pasme mbeten në kontakt për të garantuar forcën shtytëse në shina.

“Ky mjet, sikurse tashmë dihet, mund të lëvizë si në hekurudhë, ashtu edhe në rrugët normale. Mjetet e zakonshme kanë vetëm një nga funksionet, por ky mund të arrijë te banorët si autobus dhe t’i shoqërojë ata si tren gjithashtu. Ne presim që në zonat rurale, ku popullsia po plaket, ai të kthehet në një formë të re të transportit publik”, tha Shigeki Miura nga Hekurudha e Japonisë.

Në prodhim që prej vitit 2002, autobusi-tren ka kapacitetin për të transportuar 21 pasagjerë, me një shpejtësi prej 60 kilometra në orë, kur ndodhet në shina dhe me rreth 100 kur ecën në rrugët publike.